Open arkitektkonkurranse om Jon Fosse-senteret
Den innleiande fasen er no over, og heile 182 bidrag vart sende inn!
Plan- og designkonkurransen gjaldt eit nytt formidlingsbygg for Jon Fosse.
Konkurransen starta med ei ope prekvalifisering, der deltakarane skulle levera «Konseptskisse for Fosse-senteret» på inntil tre A3-sider, anonymt.
Juryen vil velja ut inntil tre forslag som går vidare til sjølve plan- og designkonkurransen.
Konkurransen var open for arkitektar og landskapsarkitektar med godkjend eksamen tilsvarande mastergrad, eller personar og firma som kan dokumentera tilsvarande kompetanse.
Senteret skal ta vare på og styrkja samanhengen mellom Fosse sin kunst, nynorsk språk og landskapet i Strandebarm, og leggja til rette for nye kulturuttrykk med nasjonal og internasjonal relevans. Her skal publikum kunna oppleva scenekunst, musikk og utstillingar, samstundes som det vert rom for refleksjon med utsyn til fjorden.
Det nye bygget skal ha høg arkitektonisk kvalitet og, i samspel med landskapet, spegla Fosse sin kunstnarskap. Samstundes skal det bidra til eit rikt og mangfaldig kulturliv.
Norske arkitekters landsforbund er rådgjevarar for konkurranseprogrammet, konkurransefunksjonær og jurysekretær.
Jurysammensetning
Fossestiftinga, styreleiar Valgerd Svarstad Haugland
Vestland fylke: fylkesordførar Jon Askeland
Kvam herad: Ordføraren i Kvam Torgeir Næss
Liv Kildahl, oppnemnd arkitekt MNAL frå Fossestiftinga.
Håkon Matre Aasarød, oppnemnd arkitekt MNAL frå Norske arkitekters landsforbund (NAL)
Rolla som jurysekretær vil verta ivareteke av Norske arkitekters landsforbund (NAL) ved
Gisle Nataas.
